Luagu
aban weyu leibuga naruguti arabu uwara luma aban lumada Chumagü. Weiyasu ligia
tidan guríara. Merengaditi Baba Chumagü; liabiti lumada niti murusun Angüleisi ibidienti lun. Naruguti tigiri
guríyara lumada tiúna abugura.
Larigienti
hanhuñuraguni lagunu aban hebelurun lidoun aban duna eibaguati, churunrunti.
Malügili lueigien hafayahan lidan duna le, ligia hayarafadun tun aban
tidibu wewe garanatu legegu aban tuburebu laugien duna. Gastuti hasügürün
umadagu ha labugien gien tuburebu wewe to. Leti liñuraguni Baba lagu iñu
ligiati larihin aban damagasi ruon luagu uburebu le. Leti lueirin hahüchürü,
aban luchubarun dunarugun wagueina ligia lun lumada, “Repente susere bougua
duna!”
ABARIHA LUAGU ABAN WEYU
Luaguti
aban dan leibuga ñouti Baba auchaha. Gálumaugati ti luagu weyu ligia. Fufu
ñouti garabali Suedirugugien.
Aransegualoun
sun lisegu, aban lahuderun anagün. Larigienti lachülürün lidoun aban bahu aban
ñouti lasabiyuhan furumien lubati lamuñerun. Digaligiati biama sisa. Barülounti
aban emei men ani aban lanügünu to touba achüra baranahoun. Faya-faya-ñaha
tuguyati sisa to ligibuogu barana madise tuei lugune. Mararü mararü, lidanti le
magaradahan lan Baba ligia lareirun aban moure tubügürü sisa to. Leti liréin
larüna dunuru le aban lasustaragun Baba, chubeina ligia baranahoun lege
lachubara larigoun tidoun lugune. Numadagu, madüdüti nege ni murusun!
TAGÜDAHÁ LUNA LESCUELANA
Binafiti
le daünhali ñounti oura lun hebelagun irahüñü leskueloun. Sagüti binafi
lasalirun tagüdahá awistaha fulasurugu lun larihin anhein úa habei irahüñü
leskuelana ümadarugu.
Sódini
ligia larihin aban irahü dísegien agafeleha luagu aban gabayu. Ayarafadeina
ligiati gabayu lau irahü le. Leskuelanati le aníhantibuga asaminera kaba lan
ladüga. tagüdahati le raramaguati
tulenalei lerüna íchiga seña lun laburemen gabayu lun laramagun. Babati
lidan oura le aranseliti luba tagüdahá. Aban labeichuni lilügün gabayu, miralei
lauba lun leibagun furese, furese. Lachülürünti gabayu yarafa, aban lachubarun tagüdahá
lidagien émeri.
DINGU
Luaguti
aban weyu lalügüdali ti aban umadaü Baba kalan ueigien würilubei lura. Lubati
launabun aban ñou leheragún furumien. Lerenga, “Luagu aban weyu teibuga Da
arabu aban tigirunina tuma nuyawa. Tanüga negeti dingu aban tagawagüdünina lau. Le yebe tachülürün Da arabugien
gadeihá nura.”
CLICK HERE TO VIEW